ചെന്നൈ: തമിഴ്നാട്ടിൽ ജനക്ഷേമ പ്രവർത്തനങ്ങൾക്ക് മുൻഗണന നൽകി വിജയ് സർക്കാരിന്റെ പുതിയ പ്രഖ്യാപനങ്ങൾ. സാധാരണക്കാരായ ജനങ്ങൾക്ക് നേരിട്ട് ഉപകാരപ്പെടുന്ന പ്രഖ്യാപനങ്ങളാണ് മുഖ്യമന്ത്രി വിജയ് നടത്തിയത്.
വാർഷിക വരുമാനം രണ്ടര ലക്ഷം രൂപ വരെ ഉള്ള കുടുംബങ്ങൾക്ക് വർഷത്തിൽ മൂന്ന് ഗ്യാസ് സിലിണ്ടറുകൾ സൗജന്യമായി നൽകും. അടുത്ത പൊങ്കൽ ആഘോഷങ്ങൾ മുതൽ പദ്ധതി പ്രാബല്യത്തിൽ വരും.
സ്ത്രീകളുടെ സൗജന്യ ബസ് യാത്രാ പദ്ധതി കൂടുതൽ സർവീസുകളിലേക്ക് വിപുലീകരിച്ചു. നേരത്തെ ഓർഡിനറി ബസുകളിൽ മാത്രമായിരുന്ന സൗകര്യം ഇനി എക്സ്പ്രസ്, ഡീലക്സ് ബസുകളിലും ലഭ്യമാകും. സൗജന്യ യാത്രയ്ക്ക് യാതൊരുവിധ വരുമാന പരിധിയോ യാത്രകളുടെ എണ്ണത്തിൽ നിയന്ത്രണമോ ഉണ്ടാകില്ല.
ചെന്നൈയിൽ നിന്ന് 70 കിലോമീറ്റർ അകലെ നിർദ്ദേശിച്ച പരാന്ദൂർ വിമാനത്താവള പദ്ധതി വിജയ് സർക്കാർ ഉപേക്ഷിച്ചു. പാരിസ്ഥിതിക പ്രശ്നങ്ങൾ ചൂണ്ടിക്കാട്ടി സമരം ചെയ്ത പ്രാദേശികവാസികൾക്ക് പിന്തുണ പ്രഖ്യാപിച്ചാണ് തീരുമാനം.
