തമിഴ്നാട് രാഷ്ട്രീയത്തിൽ വലിയ കോളിളക്കം സൃഷ്ടിച്ചുകൊണ്ട് പുതിയ അഴിമതി ആരോപണം പുറത്തുവന്നു. വിജയ് സർക്കാരിനെതിരെ ഗുരുതര ആരോപണവുമായി ബിജെപി മുന് സംസ്ഥാന അധ്യക്ഷന് കെ അണ്ണാമലൈ രംഗത്തെത്തി. ചെന്നൈയിൽ സംഘടിപ്പിച്ച പ്രത്യേക പരിപാടിയിലാണ് അദ്ദേഹം നിർണായക വെളിപ്പെടുത്തലുകൾ നടത്തിയത്.
സർക്കാരിന്റെ വിവിധ ടെൻഡറുകൾ കൈകാര്യം ചെയ്യുന്ന കരാറുകാരിൽ നിന്ന് മന്ത്രിമാർ കോഴ ആവശ്യപ്പെടുന്നുണ്ട്. തെരഞ്ഞെടുപ്പ് പ്രചാരണത്തിന് പണം ചെലവഴിച്ചുവെന്ന കാരണം പറഞ്ഞാണ് ഈ പണം തട്ടുന്നത്. കരാറുകാരിൽ നിന്ന് രണ്ട് മുതൽ നാല് ശതമാനം വരെ കമ്മീഷൻ ആവശ്യപ്പെടുന്നുണ്ടെന്ന് അദ്ദേഹം ആരോപിച്ചു.
ഈ സംഭാഷണങ്ങളുടെ വ്യക്തമായ ഓഡിയോ തെളിവുകൾ തന്റെ കൈവശമുണ്ടെന്ന് അണ്ണാമലൈ അവകാശപ്പെട്ടു. മന്ത്രിമാരും കരാറുകാരും തമ്മിലുള്ള ഫോൺ സംഭാഷണങ്ങളാണ് പുറത്തുവന്നിട്ടുള്ളത്. അഴിമതിക്കെതിരായ കർശന നിലപാടാണ് മുഖ്യമന്ത്രിയുടേതെന്ന് അദ്ദേഹം ഓർമ്മിപ്പിച്ചു. എന്നാൽ മന്ത്രിമാരുടെ മേൽ ശക്തമായ നിയന്ത്രണം ഏർപ്പെടുത്താൻ മുഖ്യമന്ത്രി തയ്യാറാകണം.
ഇല്ലെങ്കിൽ സംസ്ഥാനത്തെ മുഴുവൻ ഭരണസംവിധാനവും പൂർണ്ണമായി താളംതെറ്റുമെന്ന് അദ്ദേഹം മുന്നറിയിപ്പ് നൽകി. വാരാന്ത്യങ്ങളിൽ പ്രത്യേക അവലോകന യോഗങ്ങൾ വിളിച്ച് ഉദ്യോഗസ്ഥരെ നിരീക്ഷിക്കണം. മന്ത്രിമാരെയും ഉദ്യോഗസ്ഥരെയും ഒരേപോലെ നിരീക്ഷിക്കണമെന്ന് അദ്ദേഹം മുഖ്യമന്ത്രിയോട് ആവശ്യപ്പെട്ടു.
തന്റെ ആദ്യ സ്വാതന്ത്ര്യദിന സന്ദേശത്തിലും കരൂരിലെ പൊതുയോഗത്തിലും മുഖ്യമന്ത്രി വിജയ് ഇക്കാര്യത്തിൽ നിലപാട് വ്യക്തമാക്കിയിരുന്നു. അഴിമതി ഒര് കാരണവശാലും വെച്ചുപൊറുപ്പിക്കില്ലെന്ന് അദ്ദേഹം ജനങ്ങൾക്ക് ഉറപ്പ് നൽകിയിരുന്നു. ഉദ്യോഗസ്ഥർ കൈക്കൂലി ആവശ്യപ്പെട്ടാൽ ആരും പണം നൽകരുതെന്നും അദ്ദേഹം അഭ്യർത്ഥിച്ചിരുന്നു.
മുഖ്യമന്ത്രിയുടെ ഈ പ്രഖ്യാപനങ്ങൾക്ക് പിന്നാലെയാണ് പുതിയ വിവാദം തലപൊക്കിയിരിക്കുന്നത്. വിജയ് സർക്കാരിന്റെ അഴിമതിവിരുദ്ധ പ്രതിച്ഛായയെ ചോദ്യം ചെയ്യുന്നതാണ് ഈ വെളിപ്പെടുത്തൽ. സർക്കാരിന്റെ തുടക്കത്തിലുള്ള വീഴ്ചകളിലേക്ക് ഇത് വിരൽ ചൂണ്ടുന്നു. വരും ദിവസങ്ങളിൽ തമിഴ്നാട് രാഷ്ട്രീയത്തിൽ ഈ വിഷയം വലിയ ചർച്ചയാകാനാണ് സാധ്യത.
