എറണാകുളം: സീരിയൽ താരങ്ങളുടെ സംഘടനയായ ആത്മ (ATMA) ഇരുപത്തിയൊന്നാം വാർഷിക ജനറൽ ബോഡി മീറ്റിംഗ് എറണാകുളത്ത് നടന്നു. ഗോകുലം കൺവെൻഷൻ സെന്ററിലായിരുന്നു സംഘടനയുടെ യോഗം ചേർന്നത്.
നാനൂറിലധികം സീരിയൽ താരങ്ങൾ ഈ വാർഷിക സമ്മേളനത്തിൽ പങ്കെടുത്തു. കെബി ഗണേഷ് കുമാർ സംഘടനയുടെ പ്രസിഡന്റായി തിരഞ്ഞെടുക്കപ്പെട്ടു. ദിനേശ് പണിക്കർ ജനറൽ സെക്രട്ടറിയായും ചുമതലയേറ്റു.
കിഷോർ സത്യ, മോഹൻ അയിരൂർ എന്നിവർ വൈസ് പ്രസിഡന്റുമാരാണ്. പൂജപ്പുര രാധാകൃഷ്ണൻ സെക്രട്ടറിയും സാജൻ സൂര്യ ട്രഷററുമായി പ്രവർത്തിക്കും. യോഗത്തിൽ മുതിർന്ന അംഗങ്ങൾക്ക് പെൻഷൻ വിതരണം ചെയ്തു.
മികച്ച വിജയം നേടിയ അംഗങ്ങളുടെ മക്കൾക്ക് സ്കോളർഷിപ്പുകളും നൽകി. കേന്ദ്ര-സംസ്ഥാന പുരസ്കാരങ്ങൾ നേടിയ അംഗങ്ങളെ യോഗത്തിൽ പ്രത്യേകം ആദരിച്ചു.
യോഗത്തിന് ശേഷം അംഗങ്ങൾക്കായി സ്റ്റേജ് ഷോ നടന്നു. ഫാഷൻ ഷോയും പരിപാടിയുടെ ഭാഗമായി സംഘടിപ്പിച്ചിരുന്നു. താരങ്ങളുടെ ഒത്തുചേരൽ പരിപാടിക്ക് കൂടുതൽ നിറം പകർന്നു.
