സംസ്ഥാനത്ത് അടിയന്തരമായി വൈദ്യുതി നിയന്ത്രണം ഏർപ്പെടുത്താൻ സാധ്യതയുണ്ടെന്ന് കേരള സ്റ്റേറ്റ് ഇലക്ട്രിസിറ്റി ബോർഡ് വ്യക്തമാക്കുന്നു. വൈകീട്ട് ഏഴ് മണി മുതൽ രാത്രി 12 മണി വരെ നിയന്ത്രണം ഉണ്ടായേക്കാം.
15 മിനിറ്റ് മുതൽ അരമണിക്കൂർ വരെ ഭാഗികമായി വൈദ്യുതി തടസ്സപ്പെടാൻ സാധ്യത കാണുന്നു. ദേശീയതലത്തിൽ അനുഭവപ്പെടുന്ന വൈദ്യുതി ലഭ്യതക്കുറവാണ് പ്രധാന കാരണമായി ബോർഡ് ചൂണ്ടിക്കാണിക്കുന്നത്.
ഇന്നലെയും സംസ്ഥാനത്ത് വിവിധ ഇടങ്ങളിൽ ഭാഗികമായി വൈദ്യുതി നിയന്ത്രണം ഏർപ്പെടുത്തിയിരുന്നു. പ്രതിസന്ധി പൂർണ്ണമായി പരിഹരിക്കാൻ ഇതുവരെ സാധിച്ചിട്ടില്ലെന്ന് ഉദ്യോഗസ്ഥർ വ്യക്തമാക്കി.
പീക്ക് സമയങ്ങളിൽ 600 മുതൽ 700 മെഗാവാട്ടിന്റെ കുറവാണ് നിലവിൽ രേഖപ്പെടുത്തുന്നത്. ഇത് വിതരണ ശൃംഖലയെ വലിയ രീതിയിൽ ബാധിക്കുന്നുണ്ട്.
പവർ എക്സ്ചേഞ്ചുകളിൽ നിന്ന് പ്രതീക്ഷിച്ചത്ര വൈദ്യുതി ലഭ്യമാകാത്തത് തിരിച്ചടിയായി മാറുകയാണ്. കൂടാതെ മഴ കുറഞ്ഞതും ആഭ്യന്തര ഉൽപ്പാദനത്തെ പ്രതികൂലമായി ബാധിച്ചിട്ടുണ്ട്.
വൈകീട്ടത്തെ പീക്ക് അവറുകളിൽ അനാവശ്യ വൈദ്യുതി ഉപയോഗം പൂർണ്ണമായി ഒഴിവാക്കാൻ ജനങ്ങളോട് അഭ്യർത്ഥിക്കുന്നു. നിയന്ത്രണങ്ങൾ ഒഴിവാക്കാൻ പൊതുജനങ്ങളുടെ സഹകരണം അത്യന്താപേക്ഷിതമാണെന്ന് അധികൃതർ ഓർമ്മിപ്പിക്കുന്നു.
