നടി തൃഷയ്ക്കെതിരെ ഡി.എം.കെ നേതാവ് ഉദയനിധി സ്റ്റാലിൻ നടത്തിയ അധിക്ഷേപ പരാമർശം വലിയ വിവാദമായിരിക്കുകയാണ്. സംഭവത്തിൽ പ്രമുഖ ഗായികയും ഡബ്ബിങ് ആർട്ടിസ്റ്റുമായ ചിന്മയി ശ്രീപദ ശക്തമായ പ്രതിഷേധവുമായി രംഗത്തെത്തി.
തൃഷയ്ക്ക് പൂർണ്ണ പിന്തുണ പ്രഖ്യാപിച്ച ചിന്മയി, ഉദയനിധിയുടെ നടപടി അങ്ങേയറ്റം നിരാശാജനകമാണെന്ന് എക്സിൽ കുറിച്ചു. യഥാർത്ഥ രാഷ്ട്രീയ വിഷയങ്ങളിൽ ശ്രദ്ധ കേന്ദ്രീകരിക്കാനാണ് നേതാക്കൾ തയ്യാറാകേണ്ടത്. രാഷ്ട്രീയവുമായി യാതൊരു ബന്ധവുമില്ലാത്ത സ്ത്രീകളെ ഇതിലേക്ക് വലിച്ചിഴയ്ക്കുന്നത് ശരിയായ പ്രവണതയല്ലെന്ന് അവർ വിമർശിച്ചു.
കാവേരി നദീജല തർക്കവുമായി ബന്ധപ്പെട്ട് തഞ്ചാവൂരിൽ പ്രതിഷേധം നടക്കുകയായിരുന്നു. ഈ വേളയിലാണ് സദസ്സിൽ നിന്ന് ‘തൃഷ, തൃഷ’ എന്ന് മുദ്രാവാക്യം ഉയർന്നത്. എന്നാൽ സദസ്സിലുള്ളവരെ നിയന്ത്രിക്കുന്നതിന് പകരം, ഉദയനിധി ചിരിച്ചുകൊണ്ട് മോശമായ ദ്വയാർത്ഥ പ്രയോഗം നടത്തുകയായിരുന്നു.
തനിക്ക് ആദ്യം ഇതിന്റെ അർത്ഥം മനസ്സിലായില്ലെന്ന് ചിന്മയി പറയുന്നു. വാട്ടർ കണക്ഷനുമായി ബന്ധപ്പെട്ട കാര്യമാണെന്നാണ് താൻ കരുതിയത്. പുരുഷന്മാർക്ക് മാത്രം മനസ്സിലാകുന്ന ഒരു അശ്ലീല പ്രയോഗമായിരുന്നു അതെന്നും അവർ വ്യക്തമാക്കി.
മുൻ മുഖ്യമന്ത്രി ജയലളിതയ്ക്കും മുൻപ് സമാനമായ അധിക്ഷേപങ്ങൾ നേരിടേണ്ടി വന്നിട്ടുണ്ട്. പഴയ തലമുറയിലെ നേതാക്കളുടെ ഇത്തരം മോശം പ്രയോഗങ്ങൾ കണ്ടിട്ടുണ്ടെങ്കിലും പുതിയ തലമുറയിൽപ്പെട്ട ഒരാളിൽ നിന്ന് ഇത് പ്രതീക്ഷിച്ചില്ല. ‘വിണ്ണൈത്താണ്ടി വരുവായാ’, ’96’ തുടങ്ങിയ ചിത്രങ്ങളിൽ തൃഷയ്ക്ക് ശബ്ദം നൽകിയത് ചിന്മയി ആയിരുന്നു.
ഇതിനിടയിലാണ് തൃഷയ്ക്കെതിരായ വിവാദ പരാമർശത്തിൽ ഉദയനിധി സ്റ്റാലിനെ പോലീസ് അറസ്റ്റ് ചെയ്തത്. ചിരിച്ചുകൊണ്ട് പോലീസിനൊപ്പം പോയ അദ്ദേഹം അറസ്റ്റിനെ ഒരു തമാശയായി മാത്രമാണ് കാണുന്നത്. കേസിനെ നിയമപരമായി നേരിടുമെന്നാണ് അദ്ദേഹം പ്രതികരിച്ചത്.
സംഭവത്തിൽ ഉദയനിധിക്കെതിരെ തമിഴക വെട്രി കഴകം (TVK) ദേശീയ വനിതാ കമ്മീഷനെ സമീപിച്ചിട്ടുണ്ട്. സംസ്ഥാന വ്യാപകമായി ശക്തമായ പ്രതിഷേധ പരിപാടികൾ സംഘടിപ്പിക്കാനാണ് പാർട്ടിയുടെ തീരുമാനം.
