ന്യൂഡൽഹി: കൽക്കരി കുംഭകോണ കേസിൽ മുൻ പ്രധാനമന്ത്രി ഡോ. മൻമോഹൻ സിങ്ങിന് സുപ്രീം കോടതിയുടെ ക്ലീൻ ചിറ്റ്. കേസിൽ സിബിഐ നൽകിയ ക്ലോഷർ റിപ്പോർട്ട് ചീഫ് ജസ്റ്റിസ് അധ്യക്ഷനായ ബെഞ്ച് അംഗീകരിച്ചു.
മരണത്തിന് രണ്ടുവർഷങ്ങൾക്കിപ്പുറമാണ് അദ്ദേഹത്തിന് ഈ ചരിത്രപരമായ നീതി ലഭിച്ചിരിക്കുന്നത്. ഒഡീഷയിലെ താലാബീര-II കൽക്കരിപ്പാടം സ്വകാര്യ കമ്പനിക്ക് അനുവദിച്ച കേസിലാണ് അദ്ദേഹം കുറ്റവിമുക്തനായത്.
മുൻ പ്രധാനമന്ത്രിയും മറ്റ് അഞ്ചുപേരും വിചാരണ നേരിടണമെന്ന സിബിഐ കോടതിയുടെ ഉത്തരവാണ് സുപ്രീം കോടതി റദ്ദാക്കിയത്. മതിയായ തെളിവില്ല എന്ന സിബിഐ കണ്ടെത്തൽ പ്രത്യേക കോടതി തള്ളിയിരുന്നു.
തുടർന്ന് ആരംഭിച്ച ദീർഘമായ നിയമപോരാട്ടത്തിനാണ് ഇപ്പോൾ ഔദ്യോഗികമായി അന്ത്യമായിരിക്കുന്നത്. സാധുവായ കാരണങ്ങളില്ലാതെയാണ് സിബിഐയുടെ ക്ലോഷർ റിപ്പോർട്ട് പ്രത്യേക കോടതി തള്ളിയതെന്ന് ചീഫ് ജസ്റ്റിസ് നിരീക്ഷിച്ചു.
സിബിഐ സമർപ്പിച്ച രണ്ട് വ്യത്യസ്ത ക്ലോഷർ റിപ്പോർട്ടുകളും വിശദമായ അന്വേഷണത്തിന്റെ അടിസ്ഥാനത്തിലുള്ളതാണെന്ന് കോടതി വ്യക്തമാക്കി. ഈ കേസിൽ യാതൊരുവിധ ക്രിമിനൽ കുറ്റവും നിലനിൽക്കില്ലെന്നാണ് ബെഞ്ചിന്റെ വിലയിരുത്തൽ.
പ്രത്യേക കോടതിയുടെ ഉത്തരവ് വന്നതിന് പിന്നാലെ 2015 ഏപ്രിൽ ഒന്നിന് തന്നെ സുപ്രീം കോടതി ഇത് സ്റ്റേ ചെയ്തിരുന്നു. അന്ന് മുതൽ ആരംഭിച്ച സുപ്രീം കോടതിയിലെ നിയമയുദ്ധമാണ് അവസാനിച്ചത്.
എതിരാളികൾ പോലും അംഗീകരിക്കുന്ന മൻമോഹൻ സിങ്ങിന്റെ സത്യസന്ധമായ രാഷ്ട്രീയ ജീവിതത്തിന്മേൽ പതിച്ച കരിനിഴലാണ് ഇതോടെ നീങ്ങിയത്. സുപ്രീം കോടതിയുടെ ഈ നിർണായക വിധിയിലൂടെ അദ്ദേഹത്തിന്റെ നിരപരാത്വം ഒരിക്കൽക്കൂടി ഔദ്യോഗികമായി തെളിയുകയാണ്.
