തിരുവനന്തപുരം: സംസ്ഥാനത്ത് അന്ധവിശ്വാസ ചൂഷണങ്ങളും ഹാനികരമായ മന്ത്രവാദ പ്രവൃത്തികളും തടയുന്നതിന് ശക്തമായ നിയമനിർമാണത്തിന് ഒരുങ്ങി കേരള സർക്കാർ. രൂപീകരിച്ച വിദഗ്ധ സമിതി ഇത് സംബന്ധിച്ച അന്തിമ റിപ്പോർട്ടും കരട് ബില്ലും സർക്കാരിന് കൈമാറി.
അമാനുഷികമായ ശക്തികളുണ്ടെന്ന് തെറ്റിദ്ധരിപ്പിച്ച് ജനങ്ങളെ വഞ്ചിക്കുന്നത് തടയാൻ പുതിയ നിയമത്തിലൂടെ കഴിയും. ഭീഷണിപ്പെടുത്തി ഭയം സൃഷ്ടിക്കുന്ന രീതികൾ തടയുന്നതിനും നിയമത്തിൽ വ്യക്തമായ വ്യവസ്ഥകൾ ഉൾപ്പെടുത്തിയിട്ടുണ്ട്.
ജനങ്ങൾക്ക് ശാരീരികമോ മാനസികമോ സാമ്പത്തികമോ ആയ ദോഷങ്ങൾ വരുത്തുന്ന പ്രവൃത്തികൾ പൂർണ്ണമായി തടയുകയാണ് നിയമത്തിന്റെ ലക്ഷ്യം. ചൂഷണങ്ങൾ തടയുമ്പോഴും പൗരന്മാരുടെ ഭരണഘടനാപരമായ വിശ്വാസ സ്വാതന്ത്ര്യം പൂർണ്ണമായി സംരക്ഷിക്കപ്പെടും.
നിയമപരമായ രീതിയിലുള്ള മതപരമായ അനുഷ്ഠാനങ്ങളെയും പരമ്പരാഗത ആചാരങ്ങളെയും ഈ ബിൽ ബാധിക്കുകയില്ല. പൊതുജനങ്ങളിൽ നിന്ന് ശേഖരിച്ച നിർദേശങ്ങളും ഭരണഘടനാ സംരക്ഷണങ്ങളും സമിതി സമഗ്രമായി പരിശോധിച്ചിട്ടുണ്ട്.
മുൻ ജില്ലാ ജഡ്ജി കെ. ശശിധരൻ നായർ, മുൻ സംസ്ഥാന പോലീസ് മേധാവി ജേക്കബ് പുന്നൂസ് എന്നിവരായിരുന്നു സമിതിയിലെ പ്രമുഖ അംഗങ്ങൾ. സാമൂഹിക നിയമ ഭരണഘടനാ മേഖലകൾ വിശദമായി പഠിച്ച ശേഷമാണ് സമിതി കരട് ബില്ലിന് രൂപം നൽകിയത്.
നിലവിലുള്ള നിയമങ്ങളുടെ പരിമിതികൾ സമിതി പൂർണ്ണമായി വിലയിരുത്തുകയുണ്ടായി. മറ്റ് സംസ്ഥാനങ്ങളിൽ നിലവിലുള്ള സമാന നിയമങ്ങളും സംഘം സവിശേഷമായി പഠിച്ചു. കേരളത്തിന്റെ പ്രത്യേക സാമൂഹിക അന്തരീക്ഷത്തിന് അനുയോജ്യമായ കരട് നിയമമാണ് ഇപ്പോൾ സമർപ്പിച്ചിരിക്കുന്നത്.
വിദഗ്ധ സമിതിയുടെ റിപ്പോർട്ട് ഇനി മന്ത്രിസഭയുടെ പരിഗണനയ്ക്ക് എത്തും. സർക്കാരിന്റെ അംഗീകാരം ലഭിച്ച ശേഷമായിരിക്കും നിയമസഭയിൽ ബിൽ അവതരിപ്പിക്കുക.
