കർണാടകയിലെ പെട്രോൾ സാമ്പിളുകളിൽ അനുവദനീയമായ പരിധിയേക്കാൾ കൂടുതൽ എഥനോൾ കണ്ടെത്തിയെന്ന വിവാദത്തിൽ പ്രതികരണവുമായി പൊതുമേഖലാ എണ്ണക്കമ്പനികൾ.
സംസ്ഥാന സർക്കാരിന്റെ വിവിധ വകുപ്പുകൾ പുറത്തുവിട്ട കണ്ടെത്തലുകൾക്ക് പിന്നാലെയാണ് ഇന്ത്യൻ ഓയിൽ കോർപ്പറേഷൻ (IOCL), ഭാരത് പെട്രോളിയം (BPCL), ഹിന്ദുസ്ഥാൻ പെട്രോളിയം (HPCL) എന്നിവ വിശദീകരണവുമായി രംഗത്തെത്തിയത്.
സാങ്കേതിക മാനദണ്ഡങ്ങൾ പാലിച്ചുള്ള പരിശോധനകളിൽ ക്രമക്കേടുകളൊന്നും കണ്ടെത്തിയിട്ടില്ലെന്നും സർക്കാർ ഉന്നയിച്ച ആരോപണങ്ങൾക്ക് അടിസ്ഥാനമില്ലെന്നുമാണ് കമ്പനികളുടെ നിലപാട്.
എന്നാൽ ഈ വിശദീകരണങ്ങൾക്കിടയിൽ ലബോറട്ടറി പരിശോധനാ ഫലങ്ങൾ പുറത്തുവിട്ട് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി രംഗത്തെത്തിയതോടെ വിവാദം കൂടുതൽ ശക്തമായി.
കർണാടകയിലെ ഏഴ് ജില്ലകളിൽനിന്ന് ശേഖരിച്ച പെട്രോൾ സാമ്പിളുകളിൽ ചിലതിൽ 30 ശതമാനത്തിലധികം എഥനോൾ അടങ്ങിയിട്ടുണ്ടെന്നാണ് പുറത്തുവന്ന പരിശോധനാ റിപ്പോർട്ടുകൾ സൂചിപ്പിക്കുന്നത്.
ഇന്ത്യൻ ഓയിൽ കോർപ്പറേഷന്റെ ഒരു സാമ്പിളിൽ 31.2 ശതമാനവും ഹിന്ദുസ്ഥാൻ പെട്രോളിയത്തിന്റെ സാമ്പിളിൽ 30.5 ശതമാനവും എഥനോൾ കണ്ടെത്തിയെന്നാണ് റിപ്പോർട്ട്.
ബെംഗളൂരു, കോലാർ, ചിക്കബെല്ലാപ്പൂർ, ബെംഗളൂരു റൂറൽ, രാമനഗര, മംഗളൂരു, തുമകൂരു ജില്ലകളിൽ നിന്നാണ് സാമ്പിളുകൾ ശേഖരിച്ചത്.
പൊതുമേഖലാ കമ്പനികൾക്കൊപ്പം നയാര എനർജി, ഷെൽ തുടങ്ങിയ സ്വകാര്യ കമ്പനികളുടെ ഇന്ധന സാമ്പിളുകളും പരിശോധനയ്ക്ക് വിധേയമാക്കിയിരുന്നു. ആകെ 14 സാമ്പിളുകളിൽ 11 എണ്ണത്തിലും എഥനോൾ സാന്നിധ്യം 20 ശതമാനത്തിന് മുകളിലാണെന്നാണ് രാഹുൽ ഗാന്ധിയുടെ ആരോപണം.
‘E20 ഇപ്പോൾ 420 ആയി മാറിയിരിക്കുന്നു’ എന്ന പരിഹാസത്തോടെയാണ് രാഹുൽ ഗാന്ധി കേന്ദ്ര സർക്കാരിന്റെ എഥനോൾ മിശ്രിത നയത്തെ വിമർശിച്ചത്.
ജനങ്ങളുടെ വാഹനങ്ങളിൽനിന്ന് പെട്രോൾ മോഷ്ടിക്കുന്നതിന് തുല്യമാണ് ഈ നടപടിയെന്നും അദ്ദേഹം ആരോപിച്ചു. എണ്ണക്കമ്പനികൾ ഇന്ധനത്തിലെ എഥനോൾ അളവിൽ നിശ്ചയിച്ചിരിക്കുന്ന പരിധി പാലിക്കുന്നുണ്ടോ എന്നതിൽ കൂടുതൽ സുതാര്യത വേണമെന്നും രാഹുൽ ആവശ്യപ്പെട്ടു.
അസംസ്കൃത എണ്ണയുടെ ഇറക്കുമതിയിലുള്ള രാജ്യത്തിന്റെ ആശ്രിതത്വം കുറയ്ക്കുക, ആഭ്യന്തര എഥനോൾ ഉൽപ്പാദനത്തിന് പ്രോത്സാഹനം നൽകുക തുടങ്ങിയ ലക്ഷ്യങ്ങളോടെയാണ് കേന്ദ്ര സർക്കാർ എഥനോൾ മിശ്രിത പദ്ധതി നടപ്പാക്കുന്നത്.
നിലവിൽ 20 ശതമാനം വരെ എഥനോൾ കലർത്തിയ പെട്രോളാണ് E20 എന്നറിയപ്പെടുന്നത്.
എന്നാൽ നിശ്ചിത പരിധിക്ക് മുകളിൽ എഥനോൾ കലർത്തുന്നത് വാഹനങ്ങളുടെ എൻജിൻ പ്രവർത്തനത്തെയും ഇന്ധനക്ഷമതയെയും ബാധിക്കുമോ എന്ന ആശങ്കയും ഉയരുന്നുണ്ട്.
പ്രത്യേകിച്ച് E20 ഇന്ധനത്തിന് അനുയോജ്യമല്ലാത്ത പഴയ വാഹനങ്ങളുടെ കാര്യത്തിൽ ആശങ്കകൾ നിലനിൽക്കുന്നു.
ഒരുവശത്ത് പരിശോധനാ ഫലങ്ങൾ ഉയർത്തിക്കാട്ടി രാഷ്ട്രീയ വിമർശനം ശക്തമാകുമ്പോൾ മറുവശത്ത് ആരോപണങ്ങൾ തള്ളുകയാണ് എണ്ണക്കമ്പനികൾ.
