കൊട്ടാരക്കര: കെഎസ്ആർടിസി കൊട്ടാരക്കര ഡിപ്പോയിലെ ഡ്രൈവറെ തൂങ്ങിമരിച്ച നിലയിൽ കണ്ടെത്തി. കുണ്ടറ കുഴിയം സ്വദേശി ബാബുവിനെയാണ് ഡിപ്പോയ്ക്ക് സമീപമുള്ള ഷോപ്പിങ് കോംപ്ലക്സിലെ ഓഫീസ് വരാന്തയിൽ മരിച്ച നിലയിൽ കണ്ടെത്തിയത്. നീണ്ടകാലത്തെ ഔദ്യോഗിക പ്രതിസന്ധികൾക്ക് ഒടുവിൽ ബാബു സ്വയം ജീവിതം അവസാനിപ്പിച്ചത് സഹപ്രവർത്തകരിലും നാട്ടുകാരിലും വലിയ ഞെട്ടലാണ് സൃഷ്ടിച്ചിരിക്കുന്നത്.
സസ്പെൻഷൻ നൽകിയ ആഘാതം 2025 ഫെബ്രുവരിയിൽ കോൺഗ്രസ് അനുകൂല സംഘടന നടത്തിയ സമരത്തിൽ പങ്കെടുത്തതിനെത്തുടർന്ന് ബാബു ഉൾപ്പെടെ നാല് ജീവനക്കാരെ കെഎസ്ആർടിസി മാനേജ്മെന്റ് സസ്പെൻഡ് ചെയ്തിരുന്നു. ഒരു വർഷത്തോളം നീണ്ടുനിന്ന സസ്പെൻഷൻ കാലയളവ് ഇദ്ദേഹത്തിന്റെ ജീവിതത്തിന്റെ താളം തെറ്റിച്ചു. കഴിഞ്ഞ മാർച്ച് മാസത്തിലാണ് ഇദ്ദേഹം വീണ്ടും സർവീസിൽ തിരികെ പ്രവേശിക്കുന്നത്. എന്നാൽ, ഒരു വർഷത്തോളം ശമ്പളമില്ലാതെ കഴിഞ്ഞത് ബാബുവിനെ കടുത്ത സാമ്പത്തിക പ്രതിസന്ധിയിലേക്ക് തള്ളിവിട്ടിരുന്നു.
തുടർച്ചയായ മാനസിക സമ്മർദ്ദം കുടുംബപരമായ ബാധ്യതകൾക്കൊപ്പം ഭാര്യയുടെ ചികിത്സയും കൂടി ആയതോടെ സാമ്പത്തിക സ്ഥിതി കൂടുതൽ വഷളായി. കടുത്ത മാനസിക സമ്മർദ്ദത്തിലൂടെയാണ് ബാബു കടന്നുപോകുന്നതെന്ന് സുഹൃത്തുക്കളും ബന്ധുക്കളും സാക്ഷ്യപ്പെടുത്തുന്നു. തൊഴിൽപരമായ പ്രതിസന്ധികളും സാമ്പത്തിക ബാധ്യതകളും ഇദ്ദേഹത്തെ ആത്മഹത്യയിലേക്ക് നയിക്കുകയായിരുന്നുവെന്നാണ് പ്രാഥമിക നിഗമനം.
സംഭവം നടന്ന ഉടൻ തന്നെ കെഎസ്ആർടിസി ഡിപ്പോ അധികൃതരും പൊലീസും സ്ഥലത്തെത്തി. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റുമോർട്ടത്തിനായി ആശുപത്രി മോർച്ചറിയിലേക്ക് മാറ്റി. സംഭവത്തിൽ കൊട്ടാരക്കര പൊലീസ് കേസെടുത്ത് അന്വേഷണം ആരംഭിച്ചു. തൊഴിൽ മേഖലയിലെ ഇത്തരം സമ്മർദ്ദങ്ങൾക്കെതിരെ ശക്തമായ ഇടപെടലുകൾ വേണമെന്ന ആവശ്യവും ഉയരുന്നുണ്ട്.
