തിരുവനന്തപുരം: വീര്യം കുറഞ്ഞ മദ്യത്തിന്റെ നികുതിയും വിൽപനയും സംബന്ധിച്ച അന്തിമ തീരുമാനം യുഡിഎഫിന് വിട്ട് മുഖ്യമന്ത്രി വി.ഡി.സതീശൻ.
ബജറ്റ് ചർച്ചയ്ക്ക് മറുപടി പറയവേയാണ് അദ്ദേഹം ഇക്കാര്യം വ്യക്തമാക്കിയത്. മദ്യനയം ഒരു രാഷ്ട്രീയ തീരുമാനമാണെന്നും സഖ്യകക്ഷികളുമായി ചർച്ച ചെയ്ത് തീരുമാനമെടുക്കുമെന്നും അദ്ദേഹം പറഞ്ഞു.
വീര്യം കുറഞ്ഞ മദ്യം കേരളത്തിൽ വിൽക്കണമെന്നാണ് യുഡിഎഫ് നിലപാടെങ്കിൽ നിശ്ചയിച്ച നികുതി തുടരും. എന്നാൽ, വിൽപന വേണ്ടെന്നതാണ് യുഡിഎഫിന്റെ തീരുമാനമെങ്കിൽ സർക്കാർ അതിനൊപ്പം നിൽക്കും.
ഈ വിഷയത്തിൽ എല്ലാ ഘടകകക്ഷികളുമായും ആശയവിനിമയം നടത്തുമെന്ന് മുഖ്യമന്ത്രി അറിയിച്ചു.
വീര്യം കുറഞ്ഞ മദ്യം വിപണിയിൽ എത്തിക്കാൻ തീരുമാനിച്ചത് മുൻ എൽഡിഎഫ് സർക്കാരാണെന്ന് മുഖ്യമന്ത്രി ഓർമ്മിപ്പിച്ചു. ഒന്നാം പിണറായി സർക്കാരിന്റെ കാലത്ത് തുടങ്ങിയ ചർച്ചകൾ രണ്ടാം പിണറായി സർക്കാരിന്റെ കാലത്താണ് നടപ്പിലാക്കിയത്. എം.വി. ഗോവിന്ദൻ എക്സൈസ് മന്ത്രിയായിരിക്കുമ്പോഴാണ് ബക്കാർഡി കമ്പനിയുമായി പ്രാഥമിക ചർച്ചകൾ നടന്നത്.
യുഡിഎഫ് സർക്കാർ അധികാരത്തിൽ വന്നപ്പോൾ മുൻ സർക്കാർ ആരംഭിച്ച നടപടികളാണ് തുടർന്ന് നടപ്പിലാക്കിയതെന്ന് മുഖ്യമന്ത്രി വ്യക്തമാക്കി. ബക്കാർഡി കമ്പനിയുമായുള്ള ഇടപാടിൽ അഴിമതി ആരോപണം ഉയർന്ന സാഹചര്യത്തിലാണ് അദ്ദേഹം ഇക്കാര്യം വിശദീകരിച്ചത്. മദ്യനയം പൂർണമായും രാഷ്ട്രീയമായ തീരുമാനമാണെന്നും, യുഡിഎഫ് രൂപപ്പെടുത്തുന്ന ഡ്രാഫ്റ്റിനനുസരിച്ചായിരിക്കും തുടർനടപടികൾ എന്നും മുഖ്യമന്ത്രി ആവർത്തിച്ചു.
