ടെഹ്റാൻ: സ്വിറ്റ്സർലൻഡിൽ നടന്ന നിർണ്ണായക ഇറാൻ-യുഎസ് ചർച്ച അലസിപ്പിരിഞ്ഞു. ചർച്ചയ്ക്കിടെ യുഎസ് പ്രസിഡന്റ് ഡൊണാൾഡ് ട്രംപിന്റെ ഭീഷണികൾ ഉയർന്നതിനെത്തുടർന്ന് ഇറാൻ പ്രതിനിധികൾ ഇറങ്ങിപ്പോയെന്ന് ഇറാനിയൻ പാർലമെന്റ് സ്പീക്കർ മുഹമ്മദ് ബാഗേർ ഘാലിബാഫ് സ്ഥിരീകരിച്ചു.
വൈസ് പ്രസിഡന്റ് വാൻസിന്റെ നേതൃത്വത്തിലുള്ള അമേരിക്കൻ സംഘവുമായി 80 മിനിറ്റോളം ചർച്ച നീണ്ടുനിന്നു. എന്നാൽ പിന്നീട് ട്രംപിന്റെ ഭാഗത്തുനിന്നുണ്ടായ ഭീഷണിപരമായ പരാമർശങ്ങൾ ചർച്ചയുടെ അന്തരീക്ഷം വഷളാക്കി. “ഒപ്പിട്ട കരാറിലെ വ്യവസ്ഥകൾ പ്രകാരം ഭീഷണികൾ പാടില്ല. എന്നാൽ പ്രസിഡന്റ് ഭീഷണിപ്പെടുത്തി,” ഘാലിബാഫ് മാധ്യമങ്ങളോട് പറഞ്ഞു. ഇതിനുപിന്നാലെ ഇറാൻ സംഘം യോഗസ്ഥലം വിട്ടുപോവുകയായിരുന്നു.
തുടർന്ന്, പാകിസ്താനും ഖത്തറും ചേർന്ന് സംയുക്ത പ്രസ്താവന പുറത്തിറക്കി. അമേരിക്കൻ പക്ഷം ഇടനിലക്കാർ വഴി വീണ്ടും ചർച്ചയ്ക്ക് ശ്രമിച്ചെങ്കിലും, നേരിട്ടുള്ള ചർച്ചകൾക്കില്ലെന്ന് ഇറാൻ നിലപാട് അറിയിച്ചു. ഇറാൻ പ്രസിഡന്റ് മസൂദ് പെസ്ഷ്കിയാനും ഈ നിലപാടിനെ പിന്തുണച്ചു. കരാർ വ്യവസ്ഥകൾ പൂർണ്ണമായി നടപ്പാക്കിയാൽ മാത്രമേ ചർച്ചകൾ ഫലപ്രദമാകൂ എന്ന് അദ്ദേഹം വ്യക്തമാക്കി.
ചർച്ചയ്ക്ക് ശേഷം ഘാലിബാഫും വിദേശകാര്യ മന്ത്രി അബ്ബാസ് അരാഗ്ചിയും ഒമാനിലെത്തി. ഒമാൻ വിദേശകാര്യ മന്ത്രിയുമായി അവർ കൂടിക്കാഴ്ച നടത്തി. ഹോർമുസ് കടലിടുക്കിലെ സുരക്ഷിതമായ കപ്പൽ ഗതാഗതം ഉറപ്പാക്കുകയാണ് ഇതിന്റെ ലക്ഷ്യം. അന്താരാഷ്ട്ര നിയമങ്ങൾ പാലിച്ചുകൊണ്ട് കടലിടുക്കിന്റെ നിയന്ത്രണം ഇറാൻ തുടരുമെന്ന് അദ്ദേഹം വ്യക്തമാക്കി. അതിനിടെ, ഇടക്കാല ഉടമ്പടിയുടെ ഭാഗമായി ഇറാനിയൻ എണ്ണയ്ക്കുള്ള ഉപരോധം യുഎസ് പിൻവലിച്ചു.
