ചെന്നൈ: മുല്ലപ്പെരിയാറിൽ പുതിയ അണക്കെട്ട് നിർമിക്കാനുള്ള കേരള സർക്കാരിന്റെ നീക്കങ്ങളെ പൂർണ്ണമായും പ്രതിരോധിക്കുമെന്ന് വ്യക്തമാക്കി തമിഴ്നാട്ടിലെ ടിവികെ സർക്കാരിന്റെ ആദ്യ നയപ്രഖ്യാപനം.
തമിഴ്നാടിന്റെ തെക്കൻ ജില്ലകളുടെ ജീവനാഡിയായ മുല്ലപ്പെരിയാർ അണക്കെട്ടിന്റെ സുരക്ഷ ഉറപ്പാക്കിക്കൊണ്ട് ജലനിരപ്പ് ഉയർത്തുകയാണ് തങ്ങളുടെ ലക്ഷ്യമെന്ന് സർക്കാർ നിയമസഭയിൽ പ്രഖ്യാപിച്ചു.
ഗവർണർ നടത്തിയ നയപ്രഖ്യാപന പ്രസംഗത്തിലാണ് കേരളത്തിന്റെ ആവശ്യങ്ങളെ തള്ളിക്കൊണ്ടുള്ള ഔദ്യോഗിക നിലപാട് തമിഴ്നാട് സർക്കാർ വ്യക്തമാക്കിയത്. തമിഴ് തായ് വാഴ്ത്ത് ആലപിച്ചുകൊണ്ട് ആരംഭിച്ച നിയമസഭാ സമ്മേളനത്തിൽ പുതിയ അംഗങ്ങളെ ഗവർണർ ഹാർദ്ദവമായി അഭിനന്ദിച്ചു.
കേരളത്തിന്റെ ശ്രമങ്ങൾക്ക് തടയിടാൻ കടുത്ത നടപടികൾ
മുല്ലപ്പെരിയാർ വിഷയത്തിൽ കേരള സർക്കാർ സ്വീകരിക്കുന്ന നിലപാടുകൾ തമിഴ്നാടിന്റെ താല്പര്യങ്ങൾക്ക് വിരുദ്ധമാണെന്നാണ് നയപ്രഖ്യാപന പ്രസംഗത്തിൽ പ്രധാനമായും ചൂണ്ടിക്കാണിക്കുന്നത്.
2014-ലെ സുപ്രീം കോടതി ഉത്തരവ് പ്രകാരം മുല്ലപ്പെരിയാറിലെ ജലനിരപ്പ് 142 അടിയായി ഉയർത്താൻ തമിഴ്നാടിന് അനുമതി ലഭിച്ചിരുന്നു.
അണക്കെട്ട് കൂടുതൽ ബലപ്പെടുത്തിയ ശേഷം ജലനിരപ്പ് 152 അടിയായി ഉയർത്താമെന്ന കോടതി നിർദേശം നിലനിൽക്കുന്നുണ്ടെന്നും സർക്കാർ ഓർമ്മിപ്പിച്ചു.
എന്നാൽ അണക്കെട്ട് ബലപ്പെടുത്തുന്നതിനുള്ള അവശ്യമായ ജോലികൾ ചെയ്യാനുള്ള അനുമതി കേരളം തുടർച്ചയായി നിഷേധിക്കുകയാണെന്ന് തമിഴ്നാട് കുറ്റപ്പെടുത്തി.
പുതിയ അണക്കെട്ട് എന്ന കേരളത്തിന്റെ ആവശ്യത്തെ നിയമപരമായും രാഷ്ട്രീയമായും ശക്തമായി നേരിടുമെന്ന് സർക്കാർ വ്യക്തമാക്കി.
ജലനിരപ്പ് 152 അടിയാക്കാൻ അറ്റകുറ്റപ്പണികൾ വേഗത്തിലാക്കും
മുല്ലപ്പെരിയാർ അണക്കെട്ട് പ്രദേശത്ത് ആവശ്യമായ അറ്റകുറ്റപ്പണികൾ സമയബന്ധിതമായി പൂർത്തിയാക്കാൻ ടിവികെ സർക്കാർ പ്രത്യേക മുൻഗണന നൽകും.
നിലവിലെ അണക്കെട്ട് പൂർണ്ണ സുരക്ഷിതമാണെന്നും അറ്റകുറ്റപ്പണികൾ പൂർത്തിയാകുന്നതോടെ ജലനിരപ്പ് 152 അടിയായി ഉയർത്താൻ നടപടി സ്വീകരിക്കുമെന്നും ഗവർണർ അറിയിച്ചു.
ജാതിക്കും മതത്തിനും പണത്തിനും അതീതമായി ജനക്ഷേമത്തിനായി നിലകൊള്ളുന്ന പ്രസ്ഥാനമാണ് ടിവികെ എന്ന് പ്രസംഗത്തിൽ അടിവരയിട്ടു പറഞ്ഞു. പെരിയാർ, അണ്ണാദുരൈ, അംബേദ്കർ എന്നിവരുടെ ദർശനങ്ങളിൽ ഊന്നിയാണ് പുതിയ സർക്കാർ മുന്നോട്ട് പോകുന്നതെന്നും നയപ്രഖ്യാപനത്തിൽ വ്യക്തമാക്കിയിട്ടുണ്ട്.
മുൻ ഡിഎംകെ സർക്കാരിനെതിരെയും കേന്ദ്ര നയങ്ങൾക്കെതിരെയും കടുത്ത വിമർശനം
മുൻപ് തമിഴ്നാട് ഭരിച്ചിരുന്ന ഡിഎംകെ സർക്കാരിനെതിരെ കടുത്ത വിമർശനങ്ങളാണ് നയപ്രഖ്യാപന പ്രസംഗത്തിൽ ഉടനീളം ഉന്നയിച്ചിട്ടുള്ളത്. തമിഴ്നാട്ടിൽ കുറ്റകൃത്യങ്ങൾ പെരുകുന്നതിന് പ്രധാന കാരണം ഈ ലഹരിയൊഴുക്കാണെന്നും സർക്കാർ ചൂണ്ടിക്കാണിക്കുന്നു. അതേസമയം, കേന്ദ്ര സർക്കാരിന്റെ ദേശീയ വിദ്യാഭ്യാസ നയത്തെ ശക്തമായി എതിർക്കുമെന്നും സംസ്ഥാനത്ത് പരമ്പരാഗതമായ ദ്വിഭാഷാ നയം തന്നെ തുടരുമെന്നും ഗവർണർ പ്രഖ്യാപിച്ചു. സംസ്ഥാനത്തെ ബാധിക്കുന്ന മൗലിക വിഷയങ്ങളിൽ തങ്ങൾ എപ്പോഴും ദ്രാവിഡ പാർട്ടികളുടെ ശക്തമായ നിലപാടുകൾക്കൊപ്പം ഉറച്ചുനിൽക്കുമെന്നും ടിവികെ വ്യക്തമാക്കി.
