സമരം ചെയ്തും ജയിലിൽ കിടന്നും ശീലമില്ലാത്തയാളാണ് പ്രതിപക്ഷനേതാവ് വിഡി സതീശനെന്ന് പൊതുവിദ്യാഭ്യാസ മന്ത്രി വി ശിവൻകുട്ടി. അതുകൊണ്ടാണ് രാഹുൽ മാങ്കൂട്ടത്തിൽ അറസ്റ്റ് ചെയ്യപ്പെട്ടതിൽ അദ്ദേഹം വിലപിക്കുന്നതെന്ന് മന്ത്രി പറഞ്ഞു. രാഷ്ട്രീയത്തിൽ പോലീസ് കേസും അറസ്റ്റുമെല്ലാം സ്വാഭാവികമാണ്. അത് ഇത്തരം വിലാപങ്ങളൊന്നും ആവശ്യമില്ലെന്നും അദ്ദേഹം പറഞ്ഞു.ഒരു അറസ്റ്റിനെ പോലും അഭിമുഖീകരിക്കാൻ ആവാത്ത നാണംകെട്ട പ്രതിപക്ഷ പാർട്ടിയാണ് കോൺഗ്രസെന്ന് ശിവൻകുട്ടി പറഞ്ഞു. തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം. സമരങ്ങൾക്കിടെ കുറ്റകൃത്യം ചെയ്താൽ സർക്കാർ എടുക്കേണ്ട ന്യായമായ നടപടികളാണ് ഇപ്പോൾ എടുത്തിട്ടുള്ളത്. അക്രമത്തിന്റെ പേരിൽ പോലീസ് കേസ് രജിസ്റ്റർ ചെയ്തു. അതിന്റെ അടിസ്ഥാനത്തിലാണ് അറസ്റ്റ് നടന്നിട്ടുള്ളത്.
പോലീസിന്റെ മൃഗീയ വേട്ടയ്ക്ക് ഇരയായവർ ഇപ്പോഴത്തെ മന്ത്രിസഭയിൽ തന്നെയുണ്ടെന്ന് അദ്ദേഹം ചൂണ്ടിക്കാട്ടി. വയലാർ രവി ആഭ്യന്തരമന്ത്രിയായിരുന്ന കാലത്ത് എംജി കോളേജ് ചെയർമാൻ ആയിരുന്ന സനൽകുമാറിന്റെ പിതാവിനെ മകൻ സമരം ചെയ്തതിന്റെ പേരിൽ അറസ്റ്റ് ചെയ്തത് കേരളം മറന്നിട്ടില്ല. ഈ അധ്യാപകൻ വയലാർ രവിയുടെ അധ്യാപകനായിരുന്നു എന്നതും പ്രസക്തമാണെന്ന് അദ്ദേഹം പറഞ്ഞു.അസെതമയം സംസ്ഥാനത്ത് ഭരണകൂട ഭീകരതയെന്ന് പ്രതിപക്ഷ നേതാവ് വി ഡി സതീശൻ പ്രസ്താവിച്ചു. പ്രതിപക്ഷ രാഷ്ട്രീയ പ്രവർത്തനത്തെ സർക്കാർ അടിച്ചമർത്തുകയാണെന്ന് അദ്ദേഹം പറഞ്ഞു.
