വള്ളത്തിൽ നിന്ന് യാത്ര ചെയ്യവേ ബോട്ട് ഇടിച്ച് വെള്ളത്തിൽ വീണ വിദ്യാർത്ഥിനിയുടെ മൃതദേഹം കണ്ടെടുത്തു

കോട്ടയം: അയ്മനം കരീമഠത്തിൽ സർവീസ് ബോട്ട് വള്ളത്തിലിടിച്ച് കാണാതായ പെൺകുട്ടിയുടെ മൃതദേഹം കണ്ടെത്തി. അയ്മനം കരീമഠത്തിൽ വാഴപ്പറമ്പിൽ രതീഷിന്‍റെ മകൾ അനശ്വരയുടെ മൃതദേഹമാണ് കണ്ടെത്തിയത്. ഇന്ന് രാവിലെ അമ്മയോടൊപ്പം സ്കൂളിലേക്ക് പോയ ഏഴാം ക്ലാസുകാരിയായ പെൺകുട്ടിയാണ് അപകടത്തിൽപ്പെട്ടത്. വള്ളത്തിൽനിന്ന് യാത്ര ചെയ്യുന്നതിനിടെയാണ് അപകടത്തിൽപ്പെട്ട് അനശ്വര വെള്ളത്തിലേക്ക് തെറിച്ചുവീണത്.

അയ്മനം കരിമഠം പെണ്ണാർത്തോട് കോലടിച്ചിറ ബോട്ട് ജെട്ടിക്ക് സമീപത്ത് ആണ് അപകടം. വീട്ടിൽ നിന്ന് ബോട്ട് ജെട്ടിയിലേക്ക് വള്ളത്തിൽ വരുമ്പോൾ സർവിസ് ‘ ബോട്ട് വള്ളത്തിൽ ഇടിച്ചാണ് അപകടം നടന്നത്.