ആരാധകർ ഏറെ ആകാംക്ഷയോടെ കാത്തിരുന്ന ദളപതി വിജയ്- ലോകേഷ് കനകരാജ് ചിത്രം തിയേറ്ററുകളിലെത്തി. തിയേറ്ററുകൾ പൂരപ്പറമ്പാക്കിയാണ് വിജയ് ആരാധകർ ചിത്രത്തെ വരവേറ്റത്. പുലർച്ചെയുള്ള ഷോ കാണാൻ ഇന്നലെ രാത്രി മുതൽ ആരാധകർ തിയേറ്ററുകള്‍ക്ക് മുന്നിൽ തമ്പടിച്ചിരുന്നു.കേരളത്തിലടക്കം ഗ്രാന്‍ഡ് റിലീസും വമ്പന്‍ പ്രീ ബുക്കിങ് കളക്ഷനും നേടിയ ചിത്രം ലോകേഷ് കനകരാജാണ് സംവിധാനം ചെയ്യുന്നത്.എന്തായാലും ലോകേഷിനോട് ആരാധകരും മാധ്യമങ്ങളും പലവട്ടം തിരിച്ചുംമറിച്ചും ചോദിച്ചിട്ടും ‘പടം പാറുങ്കേ’ എന്ന ഒറ്റവാക്കിലാണ് അദ്ദേഹം മറുപടി നല്‍കിയത്. എന്തായാലും ആ സസ്പെന്‍സിനെ ആദ്യ പ്രദര്‍ശനം കഴിയും വരെയാകും ആയുസ് ഉണ്ടാവുക.
മികച്ച പ്രേക്ഷക പ്രതികരണമാണ് ചിത്രത്തിന് ലഭിക്കുന്നത്. സോഷ്യൽ മീഡിയ പ്ലാറ്റ്ഫോമായ എക്സിൽ ലോകേഷ് കനകരാജിന്റെ സംവിധാന മികവിനെ പ്രശംസിച്ചുകൊണ്ടുള്ള പോസ്റ്റുകൾ നിറഞ്ഞിരിക്കുകയാണ്. ബ്ലോക്ക്ബസ്റ്റർ എന്ന് ചിലർ സിനിമയെ വിശേഷിപ്പിക്കുമ്പോൾ, വിജയുടെ ഇതുവരെയുള്ള ഏറ്റവും മികച്ച പ്രകടനമാണ് ചിത്രത്തിലേതെന്നാണ് മറ്റു ചിലര്‍ കുറിക്കുന്നത്.“വിജയുടെ പ്രകടനം പീക്ക് ലെവലിലേക്ക് ഉയർത്തി. ഓരോ ആക്ഷൻ രംഗങ്ങളും രോമാഞ്ചം ജനിപ്പിക്കുന്നു. സസ്പെൻസും ഇന്റർവെൽ ബ്ലോക്കും ഗംഭീരം. രണ്ടാം ഭാഗവും ഇതേ രീതിയിൽ പോയാൽ സിനിമ ബ്ലോക്ക് ബസ്റ്ററാകും ” സിനിമയുടെ ആദ്യ പകുതി കണ്ടതിന് ശേഷം ഒരു ആരാധകൻ എഴുതി.
